Eskom-hoof en vyf ander lig beseer in heli-ongeluk

Die uitvoerende hoof van Eskom, Brian Dames, en vyf ander mense is lig beseer nadat die helikopter waarin hulle gereis het naby Morwaneng buite Groblersdal neergestort het.

Volgens ʼn woordvoerder van Netcare911 Jeffrey Wicks het die helikopter Dinsdagmiddag sowat 45km buite Groblersdal in Limpopo neergestort. Hy sê Dames en die vyf ander insittendes kon daarin slaag om uit die helikopter te klim voordat dit aan die brand geraak het. Wicks sê die ses mans is op die toneel behandel. Eskom se woordvoerder, Hilary Joffe, sê die ses insittendes was Dames en die uitvoerende beamptes, Steve Lennon, Louis Malema, Kerseri Pather en twee vlieëniers. Sy sê die oorsaak van die ongeluk sal ondersoek word.