Eskom-werknemer doodgeskok

ʼn Werknemer van Eskom is doodgeskok en nog ʼn werknemer het brandwonde opgedoen terwyl hulle aan ʼn kragkabel in Ventersdorp, Noordwes gewerk het.

Kapt. Tselane Nkala, ʼn polisiewoordvoerder, sê die twee werknemers het Dinsdag aan ʼn kabel naby ʼn kragpaal gewerk. Hy sê die mans het ʼn veiligheidskabel, wat gebruik word om die elektrisiteitstoevoer af te sny, aan die foutiewe kabel vasgeheg. Die veiligheidskabel het egter losgekom terwyl hulle gewerk het. Die een werknemer is doodgeskok en is op die toneel dood verklaar. Sy kollega het brandwonde aan sy hande en bors opgedoen en is na die Ventersdorp-hospitaal geneem vir verdere behandeling.