Fietsrykampioen uit sport verban

David George

Die fietsrykampioen, David George, is vir twee jaar uit fietsry verban nadat hy positief getoets het vir die verbode middel eritropoïetien (EPO).

Die Suid-Afrikaanse Instituut vir Dwelmvrye Sport (SAIDS) het Woensdag die aankondiging gemaak nadat daar Saterdag ʼn verhoor gehou is. Khalid Galant, uitvoerende hoof van SAIDS, sê George het nie die verhoor bygewoon nie . Hy het voor die verhoor erken dat hy die middel gebruik het nadat hy op 29 Augustus tydens ʼn kompetisie positief daarvoor getoets het. Galant sê George gaan ook van die geld wat hy gewen het moet terugbetaal.

George is een van Suid-Afrika se top fietsryers; hy het al aan die Olimpiese Spele deelgeneem, was ‘n podium-wenner in die Cape Epic, en ‘n voormalige spanlid vir Lance Armstrong in die Verenigde State se Posdiens-fietsryspan in 1999 – 2000. EPO is ‘n hormoon wat die rooibloedseltelling verhoog en die atleet se suurstofvermoë verhoog en dus sy prestasie verbeter.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae