Altesaam 17 mense is beseer nadat ʼn minibus Vrydagoggend in Johannesburg omgeslaan het.
Santie Steinmann, ʼn woordvoerder van Netcare 911, sê die ongeluk het op Mainweg naby Lonehill plaasgevind. Die voertuig se band het glo gebars. “Van die 17 mense wat beseer is, is 11 ernstig beseer. Die res van die mense het geringe na matige beserings opgedoen,” het Steinmann gesê. Die beseerdes is op die toneel behandel en na verskeie hospitale in die omgewing geneem vir verdere behandeling.