Tien huise in die Morningside-landgoed in Sandton is Donderdag erg beskadig nadat ʼn waterpyp in die gebied gebars het.
Robert Mulaudzi, woordvoerder van die Johannesburgse nooddienste, het gesê die water het baie skade aangerig. “Die betrokke huise is oorstroom en het huisinhoud beskadig. Mure het ook omgeval en op voertuie beland. Ons is besig om die ander mure te stabiliseer en om puin te verwyder,” het hy gesê. Alphenstraat is vir verkeer gesluit terwyl die toneel opgeruim word. Niemand is in die voorval beseer nie.