Twee amptelike begrafnisdienste het die Gautengse regering nagenoeg R6 miljoen uit die sak gejaag, beweer die DA.
“Die DA keur in beginsel die besluit goed om status te verleen aan die begrafnisdienste van die twee individue, maar dit is moeilik om die buitensporige kostes daarvan te regverdig,” het die DA se woordvoerder, Mike Moriarty, gesê. Die begrafnisdienste was onderskeidelik vir Henry Mokgothi in April verlede jaar en Bertha Gxowa in Oktober 2010. Gauteng se woordvoerder, Matlakala Motloung, sê die presidensie neem besluite rakende amptelike begrafnisdienste. “Hierdie is individue wat bygedra het tot die vryhede wat ons vandag geniet….persone van nasionale statuur. Hulle bydrae kan nie in geldwaardes bereken word nie.” Moriarty sê hy het intussen aan die provinsie se premier, Nomvula Mokonyane, geskryf om te vra wat die riglyne is vir die toekenning van fondse vir amptelike begrafnisdienste. “Volgens Mokonyane is die geld betaal vir amptelike provinsiale begrafnisdienste…en het dit kostes ingesluit wat verband hou met spyseniering, huur en busse.” Die premier se kantoor kon egter nie meer besonderhede rakende die kostes verskaf nie. Motloung sê egter daar is maatreëls in plek ten einde te verseker dat die kostes vir amptelike begrafnisdienste nie redelike perke oorskry nie.
– SAPA
