Géén slange op die vliegtuig nie

Argieffoto

Sekuriteitswagte van OR Tambo Internasionale Lughawe het beslag gelê op ʼn vyfjarige dogtertjie en haar sesjarige boetie se twee materiaalslange, het The Star Donderdag berig.

“Hulle het gesê ʼn replika van ʼn slang word nie toegelaat nie,” het die kinders se pa, SJ Botha van Kaapstad, aan die koerant gesê. “Dit is nie ʼn plastiekding nie. As dit een van daardie rubberslangetjies was, dan kon ek nog verstaan. Maar hierdie is soos ʼn teddiebeer, die kinders gebruik dit vir kussings.”

Hy sê die wagte het verlede Donderdag probeer om die slange by die sekuriteitskandeerders te konfiskeer. Die kinders se oom, wat nie die vlug van Johannesburg na Kaapstad meegemaak het nie, het die slange saam met hom huis toe geneem.

Unathi Batyashe-Fillis, woordvoerder vir die Suid-Afrikaanse Lughawensmaatskappy (Acsa), het gesê indien enigiemand vermoed dat die sekuriteitswagte onwettig opgetree het, moet hulle met die maatskappy of die polisie in verbinding tree.