Die Edenvale-polisie is op ʼn toneel waar ʼn gewapende roof omstreeks 14:30 by ‘n poskantoor in Edenvale, Johannesburg, plaasgevind het.
Adjudant-offisier Jean Olckers, ʼn polisiewoordvoerder, het die voorval aan Maroela Media bevestig. “In die stadium kan ons nog nie te veel inligting bekend maak nie. Die polisie is nog besig om die toneel te ondersoek,” het hy gesê. Niemand is nog in verband met die voorval in hegtenis geneem nie en dit is nie bekend of die rowers met enige kontant weggekom het nie.
Olckers het bevestig die polisie ondersoek ʼn saak van gewapende roof. Na wat verneem word, is niemand in die voorval beseer nie.
