AK47-aanvalsgewere (argieffoto)
Twee vermeende rowers is Dinsdag by ʼn winkelsentrum in Witbank tydens ʼn skermutseling met transito-sekuriteitswagte doodgeskiet.
“ʼn Groep van sowat vyf mans, wat swaar gewapen was, het die SBV-sekuriteitstasiewa by Safeway-winkelsentrum in Witbank aangeval,” het brig. Selvy Mohlala, woordvoerder van die polisie in Mpumalanga, gesê. “Die sekuriteitspersoneel was in hul amptelike hoedanigheid by Eerste Nasionale Bank.”
Mohlala sê die mans het met AK-47-aanvalsgewere en pistole op die wagte losgebrand. Die wagte het teruggeskiet. “Twee verdagtes is doodgeskiet en ʼn ander onbekende man, wat as ʼn smous beskryf word, is ook doodgeskiet.”
Hy sê die vermeende rowers is moontlik van Botswana en Zimbabwe. Altwee was met 9mm-pistole gewapen.
Die rowers wat ontsnap het, is gevaarlik en hulle is met AK-47s gewapen. “Hulle het klaarblyklik geen agting vir menslike lewe nie,” het lt.gen. Thulani Ntombela, polisiekommissaris van Mpumalanga, gesê. -SAPA
Mooi so. Nog twee dooie kriminele. Die wat weggekom het sal ook gevang word. Hul dooie makkers sal die SAPS na hulle lei.