Christy Jordaan en sy seun Brandon. Foto: Belinda Rother/NSRI
Christy Jordaan (59) en sy seun Brandon (36), twee vissermanne wat sedert Woensdagmiddag in die oop see aan die Weskus vermis was, is Vrydagmiddag opgespoor.
Maroela Media het vroeër berig die Jordaans se klein vissersbootjie het krag verloor en sedert Woensdag in die see rondgedryf in die omgewing van Paternoster. Lees meer hier
“Christy en Brandon is drie dae nadat hulle vermis geraak het deur ʼn verbygaande visserboot naby Saldanhabaai gevind,” het Craig Lambinon, ʼn woordvoerder van die Nasionale Seereddingsinstituut (NSRI), gesê.
Lambinon sê die mans was in ʼn goeie luim al het hulle twee aande en drie dae op ʼn klein bootjie in rowwe seetoestande spandeer. Hulle is na ʼn hospitaal geneem vir ʼn roetine ondersoek. Hulle was erg uitgeput en gedehidreer.
