‘n Windplaas gaan binnekort naby Port Elizabeth opgerig word om elektrisiteit aan die Nelson Mandela Bay-munisipaliteit te verskaf.
MetroWind het Donderdag gesê hulle het toestemming ontvang om ‘n R550 miljoen-windplaas in Van Stadens, tussen Port Elizabeth en Jeffreysbaai op te rig. Na verwagting sal konstruksiewerk in September begin, berig SA Good News.
“Die plaas, wat as die MetroWind Van Stadens-plaas bekend sal staan, sal na verwagting in Oktober 2013 elektrisiteit aan die munisipaliteit en Eskom begin verskaf,” het Donald McGillivray, direkteur van die maatskappy, gesê.
Volgens McGillivray ondersteun die inwoners die plaas. “Die projek is ‘n stap in die regte rigting om skoon, herwinbare energie op te wek,” het hy bygevoeg.
