Die Kamer van Mynwese het Dinsdagmiddag ʼn finale aanbod van ʼn verhoging van 6% vir Solidariteit se lede in die goudbedryf gemaak. Die aanbod neem die vorm aan van ʼn tweejaarooreenkoms en is aan ʼn winsdelingskema gekoppel. Die verhoging vir jaar een bly dieselfde in jaar twee. Die vakbond het tot Donderdag 29 Augustus om op die aanbod te reageer.
Gideon du Plessis, hoofsekretaris van Solidariteit, het gesê die vakbond het die Kamer versoek om uitstel tot einde volgende week aan hom te verleen sodat hy sy lede kan raadpleeg. “Dit sal die vakbond ook kans gee om voorleggings van die onderskeie mynhuise oor hul onderskeie winsdelingskemas te ontvang en uitstaande eise te finaliseer.” Du Plessis het gesê die partye sal weer Donderdagoggend vergader oor Solidariteit se versoek.
Die Kamer se vorige aanbod was vir ʼn 5,5%-verhoging. Du Plessis het gesê die finale aanbod volg nadat Solidariteit Maandag sy eis van ʼn 10%-verhoging op die totale kostepakket na ’n 8,3%-verhoging op basiese salaris verander het.
