Griekwastad-moorde: Plaasarbeiders getuig

Deon, Christelle en Marthella Steenkamp

Arbeiders op die Steenkamp-plaas in Griekwastad het glo vroeg die oggend op Goeie Vrydag tuisgemaakte gemmerbier begin drink, het die Noord-Kaapse hooggeregshof Dinsdag gehoor.

Hulle het op 6 April 2012 saam met die vermoorde boer, Deon Steenkamp en sy gesin dorp toe gery. Die gesin was op pad om ŉ erediens by te woon.

Regter Frans Kgomo hoor tans getuienis aan in die moordsaak van ŉ 17-jarige seun wat van die moord op Steenkamp (44), sy vrou Christelle (43) en hul dogter Marthella (14) verdink word. Hulle is daardie dag omstreeks 18:00 op hul plaas Naauwhoek naby Griekwastad vermoor.

Staatsgetuie Martha Watermond, beter bekend as “Voetpad” in Griekwastad, het gesê sy het in die huis op die plaas gewerk en koekies gebak. Christelle het ŉ tuisnywerheid op die plaas bedryf.

Watermond het getuig dat sy ŉ ruk lank in die dorp was. Sy en ŉ ander plaaswerker se vrou, Katrina, het petrol van R40 aangekoop vir Jannie Koopman, beter bekend as “Makazol”, sodat hy hulle met sy Nissan 1400-bakkie kon terugneem plaas toe. “Ons het gemmerbier uitgehaal,” het sy gesê. “Mens word dronk as jy dit drink.”

Watermond het later aan die hof gesê toe hulle uit die dorp weg is, was hulle reeds onder die invloed van alkohol.

Kgomo het tydens die getuienis oor die drinkery gevra of hulle enigiets geëet het, waarop Watermond bevestig het dat hulle wel geëet het.

Sy sê sy het by die polisiestasie, toe sy hoor wat op die plaas gebeur het, haar bewussyn verloor. Sy het eers ŉ dag later in die hospitaal haar bewussyn herwin.

Die hof het gehoor dat die drinkery op die Naauwhoek-plaas voortgeduur het. Koopman en twee ander persone van die dorp het glo probeer om sy bakkie te herstel, omdat die uitlaatpyp op die plaaspad afgeval het.

Die hof het vroeër getuienis gehoor van ŉ wit motor, vermoedelik ŉ Audi, wat die aand van die moorde, verby die gestrande bakkie met vlugtende plaasarbeiders gery het.

Koopman het egter gesê daar was geen ander voertuig op die pad buiten twee polisievoertuie nie. “Nee daar was geen Audi nie, ek was te geskok,” het hy onder kruisverhoor aan Willem Coetzee, prokureur vir die verdediging, gesê.

Koopman het glo vroeër aan die polisie gesê dat ŉ Audi verby hulle op die plaaspad gery het en sy bakkie se kantspieëltjie afgery het. Ondersoekbeamptes kon egter nie enige bewyse hiervan vind nie. Hy sê hy het uiteindelik sy “kop agtermekaar gekry” en aan die polisie die waarheid vertel.

Koopman het gesê die vlekke wat op die bakkie aangetref is, was sy bloed toe hy homself beseer het terwyl hulle die uitlaatpyp reggemaak het.

Abagail Pieterse, beter bekend as “Poppie”, het aan die hof gesê Koopman se bakkie het nooit kantspieëltjies gehad nie, hulle het lank gelede afgebreek.

Abraham van Rooy, bekend as “Ou Hen”, het getuig dat hulle die oggend eers die strikke vir jakkalse en rooikatte nagegaan het. Voordat hulle weg is dorp toe, het Deon hom besoek om navraag te doen oor die strikke.

Jannie Ludick, nog ŉ plaasarbeider, het getuig dat skaaphonde op die plaas geblaf het as enigiemand die huis besoek het. Alhoewel hy die oggend dorp toe gestap het, het hy die middag saam met Koopman in sy bakkie teruggekeer plaas toe.

Die saak duur voort.

Griekwastad-moorde: Plaasarbeiders getuig

ondersteun maroela media só

Regter se weduwee het glo gejok oor sy dood

Chad le Clos breek wêreldrekord

Het jy gehoor?

Video: e.tv klink ŉ glasie op splinternuwe sepie

Sharks wil op onlangse wenmomentum voortbou

Gedagte vir die dag: Manna vir vandag

Vorige ‘Plaasjapies’ deel wenke, hoogtepunte

Peiling

nuus oor die verkiesing

Neutedop-nuusbrief