Twee gevangenes by die Mangaung korrektiewe sentrum buite Bloemfontein hou tans ‘n dokter gyselaar by dié hoësekuriteit-fasiliteit.
Volgens sersant Thabo Litabe, woordvoerder van die polisie in die Vrystaat, hou hulle die dokter reeds sedert Maandagoggend om 10:35 gyselaar. Die fasiliteit word in samewerking met Group Four-sekuriteit in ‘n staats-/privaatvennootskap bestuur. Besonderhede is nog nie duidelik nie, maar polisie is op die toneel.
“In hierdie stadium wil ons nog nie verdere inligting bekend maak nie, omdat dit ‘n sensitiewe saak is en die SAPD [Suid-Afrikaanse Polisiediens] die situasie hanteer,” het Grace Molatedi, adjunk streekkommisaris gesê.