Henning se ouers nader hof oor toesig van kleinkind

Die ouers van die vermoorde Chanelle Henning het ʼn aansoek voor die Noord-Gautengse hooggeregshof gebring om toesig van hul kleinseun te kry.

EWN berig dat Henning se 4-jarige seuntjie, Benjamin, intussen in ʼn plek van veiligheid geplaas is. ʼn Polisiewoordvoerder, ao. Duane Lightfoot, sê die polisie het nog geen verdagtes in die saak geïdentifiseer nie en die ondersoek gaan voort. Henning se vervreemde man, Nico, is Woensdag deur die polisie ondervra. Hy is egter in die stadium nie ʼn verdagte in die saak nie. Henning is Dinsdagoggend kort nadat sy Benjamin by ʼn kleuterskool in Faerie Glen afgelaai het deur twee mans op ʼn motorfiets doodgeskiet. Die motorfiets het verby haar motor gery toe die passasier op die motorfiets glo talle skote afgevuur het. Henning, ʼn onderwyser by Woodhill-kollege, is glo in die long getref. Haar motor het ʼn paar honderd meter verder tot stilstand gekom nadat dit ʼn klip op die sypaadjie getref het. Volgens berigte het Henning vermoed sy word agtervolg. Henning is deur omstanders uit die motor getrek maar is deur paramedici op die toneel dood verklaar.