Vyf mense is beseer nadat ʼn hond hulle Sondagmiddag in Booysens in Pretoria aangeval het.
LookLocal Moot berig die voorval het omstreeks 18:00 plaasgevind. “ʼn Amerikaanse veghond het los in die straat gehardloop en twee bejaarde vroue aangeval. ʼn Buurman het daarna tot die vroue se redding gekom en is ook deur die hond aangeval,” het Albert Jansen van Nieuwenhuizen, ʼn woordvoerder van Best Care Ambulansdienste, gesê.
“Die hond het toe ʼn ander vrou en haar dogter aangeval voordat dit weggehardloop het,” het Van Nieuwenhuizen bygevoeg. Al vyf mense het geringe tot matige beserings opgedoen. Die mense is op die toneel gestabiliseer en na die Netcare Moot-hospitaal geneem vir verdere behandeling.
Die hond is nog nie opgespoor nie.
Bron: LookLocal Moot