Foto: Pretoria Dieretuin
Die swartmamba wat verlede maand by die Pretoria Dieretuin vermis geraak het, is Sondag opgespoor.
“Iemand het hom gesien toe hy langs ʼn muur van die reptielpark geseil het,” het Craig Allenby, die dieretuin se woordvoerder, gesê.
“Personeel van die reptielpark het hom gevang en hou hom tans in ʼn donker houer sodat hy kan kalmeer.
Volgens Allenby is die mamba, wat intussen die bynaam Houdini gekry het, in ʼn goeie toestand en gaan hy die volgende paar dae in die houer gehou word sodat hy kan aanpas. Dit wil voorkom of die slang niks geëet het vandat hy ontsnap het nie.
Allenby het gesê Houdini is “sonder enige twyfel” die swartmamba wat ontsnap het.
Die soektog na Houdini het op 11 Maart begin nadat personeel ontdek het die slang het uit sy hok verdwyn. Daar is selfs vermoed dat die slang gesteel is.
Allenby sê Houdini kan binnekort weer deur die publiek besigtig word. Dit is nog nie duidelik hoe hy ontsnap het nie.
All’s well that ends well. Mooi so!