Baasspeurder Piet Byleveld ‘skoonveld’ met geld

Piet byleveld. Foto: Maroela Media

Piet Byleveld. Foto: Maroela Media

Oudbrigadier Piet Byleveld, wyd geag as een van Suid-Afrika se topspeurders, het glo die geliefdes van verskeie moordslagoffers met derduisende rande ingedoen. ʼn Ondersoek deur Maroela Media het aan die lig gebring dat verskeie mense nie net sonder antwoorde op hul hartseer vrae sit nie, maar ook hul geld en hoop vir afsluiting kwyt is, nadat hulle Byleveld se dienste as privaatspeurder ingeroep het.

Byleveld het al op talle groot en opspraakwekkende sake gewerk, waaronder die moorde op Sheldean Human, Inge Lotz en Leigh Matthews. Nadat hy in 2010 afgetree het, gaan hy steeds voort om in persoonlike kapasiteit misdaadsake te ondersoek.

Nou het bewerings aan die lig gekom dat Byleveld talle mense ingeloop het wat derduisende rande aan hom betaal het om hul geliefdes se moorde te ondersoek.

Maroela Media het in April 2015 berig oor Tinus Herbst (28) wat slegs sowat ʼn jaar na sy babaseuntjie se geboorte in Boksburg aan die Oos-Rand doodgeskiet is. Tinus se vrou, Chenelle, en hul seuntjie Dustin, was ook in die huis ten tyde van die voorval, maar was gelukkig ongedeerd.

Volgens Chenelle het die polisieondersoek meer as ʼn jaar later steeds niks opgelewer nie en kry sy nie genoegsame samewerking van die polisie nie. Chenelle het Piet Byleveld Crime And Commercial Investigations (PBCCI) in Augustus 2015 genader om te versoek dat Byleveld die saak ondersoek.

Chenelle en Thinus Herbst.

Chenelle en Thinus Herbst.

“Hy het gesê hy sal dit beslis ondersoek en het vir my ʼn e-pos met ʼn kwotasie van die eerste fase van die ondersoek gestuur,” vertel sy. “In daardie stadium kon ek nie die volle bedrag betaal wat hy my kwoteer het nie, maar ek het hom gevra of hy met die ondersoek kan begin indien ek solank R11 200 betaal. Hy het ingestem en ek het die geld betaal.”

Ná drie weke het die familie navraag by PBCCI gedoen om te hoor hoe die ondersoek vorder, aangesien daar glo aan haar gesê is sy sal weekliks ʼn vorderingsverslag ontvang. Volgens Chenelle het Byleveld net gesê hy is besig met die ondersoek.

Twee weke later het Chenelle hulle weer gekontak, omdat sy die res van die eerste fase se geld wou oorbetaal. Sy het egter versoek dat daar eers aan haar ʼn vorderingsverslag gestuur word om te bewys dat daar al met die ondersoek begin is. “Piet het belowe om my die volgende week te kom sien en persoonlik die verslag vir my te gee. Sedertdien het ek nooit weer van hom gehoor nie. Tot vandag toe kry ek hom nie in die hande nie,” het sy gesê.

“Ek bel en bel na sy kantoor toe en niemand antwoord ooit nie. Al die e-posse wat ek gestuur het, bly onbeantwoord. Ek het die geld betaal en nou het Piet soos ʼn groot speld verdwyn. Hierdie gaan nie eers net oor geld nie. Hy speel met mense, wat klaar deur erge trauma is, se emosies. En hy kom weg daarmee.” Chenelle het gesê sy is nie finansieel in staat om regstappe teen Byleveld te neem nie.

Maroela Media het onmiddellik vir Byleveld om kommentaar genader. Hy het egter nie telefoonoproepe geantwoord of op e-posnavrae reageer nie.

Maroela Media het intussen van nog ʼn persoon verneem wat na bewering deur Byleveld ingedoen is. Volgens Henriette Stopforth het sy tot op datum R64 384 aan Byleveld betaal om die moord op haar pa te ondersoek.

Maroela Media het weke lank probeer om Byleveld vir kommentaar te bereik. Die nommer wat op die PBCCI webtuiste aangedui word, bly onbeantwoord en daar is nie op een van Maroela Media se talle e-posse gereageer nie. Byleveld het ook nie verskeie oproepe na sy selfoon beantwoord of op SMS’e reageer nie. Sy selfoon hou net aan met lui en dan speel ʼn voorafopgeneemde stemboodskap waar Byleveld homself identifiseer.

Die sentrum waar die kantoor van Piet Byleveld Crime And Commercial Investigations sonder enige kennisgewing ontruim is.

Die sentrum waar die kantoor van Piet Byleveld Crime And Commercial Investigations sonder enige kennisgewing ontruim is.

Maroela Media het Donderdag ʼn verrassingsbesoek aan Byleveld se kantoor in Roodepoort, Johannesburg afgelê. Die adres wat op PBCCI se webtuiste aangedui word, is egter dié van ʼn kwekery in Roodepoort. Maroela Media het die korrekte adres by een van Byleveld se kliënte gekry. Dié kantoor is gesluit en ontruim. Die bestuurder van die sentrum waar die kantoor geleë is, wat versoek het om anoniem te bly, het gesê dat Byleveld ongeveer ses maande gelede sonder enige kennisgewing die kantoor ontruim en verdwyn het.

Volgens die bestuurder het Byleveld steeds ʼn huurkontrak tot einde van die jaar, maar hy het ophou huur betaal nadat hy verdwyn het. Hy reageer glo ook nie op telefoonoproepe of e-posse van die sentrumbestuur af nie.

Stopforth se pa is op 3 Junie 2014 dood aangetref op sy bed in sy huis op ʼn plaas buite Ellisras. Hy het ʼn vuurwapen in sy hand gehad en ʼn skietwond in sy kop. Die polisie het aanvanklik vermoed hy het selfmoord gepleeg, maar die saak is later na ʼn saak van moord verander.
Volgens Stopforth het die ondersoekbeampte destyds aan haar gesê daar was iets verdag aan die manier waarop die vuurwapen in haar pa se hand gelê het. ʼn Lykskouing het ook getoon dat hy gesterf het weens ʼn skietwond in sy bors. “Daar moes meer as een verdagte gewees het. Hulle het my pa in sy bors geskiet en ʼn skoot deur sy kop. Daarna het hulle hom gesleep tot by my ouers se bed, vir hom ʼn skoon hemp aangetrek en die vuurwapen in sy hand gesit sodat dit lyk asof hy homself geskiet het,” het Stopforth gesê.

Volgens Stopforth het die familie gevoel dat die polisie nie moeite doen om haar pa se moord te ondersoek nie en het die polisiespeurders nie eers al die bewysstukke op die toneel versamel nie. Stopforth het daarom net ʼn week na haar pa se dood besluit om Byleveld te nader en te vra of hy die saak sal ondersoek.

Volgens haar het Byleveld ingestem om die saak te ondersoek en sy het dadelik ʼn deposito aan hom oorbetaal. Sy moes in die daaropvolgende maande nog geld aan hom oorbetaal sodat hy met die ondersoek kan voortgaan.

“Twee jaar later het ons nog absoluut niks van Piet af gekry nie. Geen terugvoer oor die ondersoek nie, geen dokumente of verslae nie, niks. As ons sy kantoor bel, is hulle net vol leuens,” sê Stopforth. “Niemand wil iets slegs van Piet hoor nie, omdat hy veronderstel is om ʼn held in ons land te wees. Maar sy beloftes aan my was alles net leë beloftes en vandag loop my pa se moordenaars steeds vry rond.” Volgens haar is sy in die proses om regstappe teen Byleveld te neem.

Die bestuurder van die winkelsentrum waar Byleveld se kantoor was, het ook gesê dat talle mense in die afgelope ses maande by die sentrumbestuur se kantoor opgedaag het, op soek na Byleveld. Sy het gesê ongeveer 20 mense het haar al kom vra waar Byleveld homself bevind, omdat hy hulle glo geld skuld. Baie mense het verklap dat hy veronderstel is om sake vir hulle te ondersoek, maar dat hulle hom op geen manier in die hande kan kry nie.

polisie-huisroof-crime

Argieffoto: SAPD/Facebook

Een van hierdie mense, Claudio Veljkoviċ, sê hy het ʼn duur bloutjie met Byleveld geloop. Hy het Byleveld in die tweede helfte van 2015 genader om sy pa se dood te ondersoek. Volgens Veljkoviċ is sy pa op 2 November 2011 in hul huis in Secunda vermoor. Hy is met ʼn stomp voorwerp oor die kop geslaan en met ʼn plastieksak versmoor. Veljkoviċ, toe 16 jaar oud, het van die skool af gekom en sy pa se lyk voor die wasbak in die kombuis aangetref. Daar is onder meer ʼn groot bedrag kontant, juweliersware, ʼn muntversameling en ʼn Toyota Hilux-bakkie gesteel.

Volgens Veljkoviċ het die polisie binne ses maande hom laat weet dat hul ondersoek nog geen leidrade opgelewer het nie en dat die saak dus op ys geplaas word totdat meer inligting aan die lig kom.

“Ek het in 2015 begin uitvind oor privaatondersoekers wat soortgelyke sake ondersoek en almal het vir my gesê Byleveld word as die topspeurder in die land geag. Daarom het ek met hom kontak gemaak,” het Veljkoviċ verduidelik. Hy vertel hy moes R3 500 betaal om ʼn afspraak met Byleveld te kry en het hom by sy kantoor in Roodepoort gaan sien. Daar het hy sy hele verhaal vertel en Byleveld het later na hom teruggekom om te sê dat hy die saak sal ondersoek.

“Hy het vir my ʼn kwotasie van R36 500 gestuur vir die eerste fase van die ondersoek. Ek het dit in November 2015 betaal,” het Veljkoviċ gesê. “Van daar af hardloop ek agter Piet aan om uit te vind wat gaan aan met die ondersoek. Hy antwoord nie my oproepe nie, hy antwoord nie my e-posse nie en ek het nog geen vorderingsverslag oor die ondersoek ontvang nie.”

Veljkoviċ vertel hy het middel 2016 weer na Byleveld se kantoor gegaan om hom te konfronteer. Daar het hy, nes Maroela Media, gevind dat sy kantoor ontruim is. Hy het daarna Byleveld se huisadres opgespoor om hom daar te konfronteer.

“Ek was baie kwaad en het vir hom gesê ek soek nou antwoorde. Hy was baie hoflik en het gesê die rede hoekom hy nie na my toe teruggekom het nie, is omdat hy baie besig was en ook vir ʼn ruk oorsee was. Hy het gesê daar was ook iets fout met sy selfoon en hy verstaan nie hoe die nuwe selfoon wat hy tydelik gebruik, werk nie,” het Veljkoviċ bygevoeg. “Ek het vir hom gewys hoe om die foon te antwoord, omdat hy beweer het hy weet nie hoe nie. Toe het ek gesien daar is meer as 200 ongeleesde boodskappe op die foon. So duidelik lees hy niemand se boodskappe nie.”

Volgens Veljkoviċ het Byleveld gesê al sy lêers is weggepak en dat hy eers sy saak se lêer moet gaan soek voordat hy vir hom kan terugvoer gee oor die ondersoek, maar dat een van sy kollegas in Pretoria Veljkoviċ binne die volgende week sou kontak om terugvoer oor die saak te gee. Niemand het hom ooit gekontak nie en Veljkoviċ kon sedertdien nie weer vir Byleveld telefonies in die hande kry nie. Veljkoviċ het gesê hy het reeds ʼn prokureur oor die saak gespreek en beplan ook om regstappe teen Byleveld te neem.

Maroela Media het Vrydagoggend weereens vir Byleveld op sy selfoon probeer kontak, maar daar was geen antwoord nie.

Lees ook die opvolg:
Piet Byleveld: Nog talle praat hart uit; ‘Baasspeurder’ reageer

Wil jy iets onder ons aandag bring in verband met die berig? Stuur ‘n e-pos na [email protected]

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

214 Kommentare

jongste oudste gewildste
Madsi1

Voete van klei né! Money is the root of all evil…….of hoe Piet?

Kaspaas

Hierdie is skokkend. Ek het regtig ongelooflik baie respek vir hom gehad.

Riaan

Nou hoekom kan julle hom nie ook by sy huis gaan sien nie MM?

sharon

ag nee.. mens is so seer en broos na trauma en hoekom nou dit? Een mens wat mens kon vertrou….

Alida

Ag nee man!