Inbraak by Groot Constantia-wynplaas

Manor House Foto: Groot Constantia

Die museum op die Groot Constantia-wynplaas is oor die naweek van erfskatte ter waarde van sowat R50 miljoen beroof.

Sjinese porselein van miljoene rande word uit dié 17de eeuse herehuis en Izikomuseum vermis. Inspekteurs vermoed dat dit ʼn sindikaat was en dat hulle internasionale bande het wat waardevolle Sjinese porselein najaag.

Rooksana Omar, hoof uitvoerende beampte van Iziko Museums sê personeel het Maandagoggend ontdek dat verskeie waardevolle items uit die versameling vermis word. “Die saak is by die SAPS aangegee en ʼn volskaalse ondersoek is van stapel gestuur,” het sy gesê. Dit is nog nie duidelik hoe die rowers ingebreek het nie.

Die Manor House sal gesluit bly tot verdere kennisgewing. Ander fasiliteite by Groot Constantia-wynplaas bly oop vir toeriste en besoekers.

Die Groot Constantia-wynplaas dateer uit 1685 toe die grond aan die eerste goewerneur van die Kaapse Kolonie, Simon van der Stel, gegee is. Oor die laaste vier eeue is meubels, skilderye, materiaal, keramiekware en koperware van onskatbare waarde hier versamel.

Die Manor House-museum met sy restaurant vorm deel van die Jonkerhuis-kompleks. Die plaas word steeds aktief bedryf en is een van Kaapstad se gesogte toeristeaantreklikhede.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.