‘n Voorbeeld van die slenter
ʼn Internet-foefie wat beweer die bekende kletsrymer, Eminem, is met ʼn mes aangeval, het sommige nuuskierige sosialemedia-gebruikers in ʼn slenter laat beland.
ʼn Boodskap doen die ronde dat Eminem glo vier keer deur ʼn aanhanger met ʼn mes gesteek is. Die boodskap wys ook ʼn gru-foto van iemand se rug met vier snymerke, asook ʼn “gepaardgaande video” wat net vir “mense ouer as 18” bedoel is.
Volgens die webwerf About.com is die storie egter ʼn slenter om Facebook- en Twitter-gebruikers op bemarkingswebwerwe te kry.
“Die storie is onwaar en die video bestaan nie eens nie. Verbruikers wat op die skakel klik word na ‘webwerwe’ herlei wat ‘gratis pryse’ belowe, wat ook nie bestaan nie, vir mense wat ʼn aanlyn-opname voltooi,” berig About.com.
“Mense wat die instruksies volg, deel gewoonlik die skakel op hul eie sosialemedia-rekeninge, wat veroorsaak dat hul eie vriende in dieselfde strik trap.”
ʼn Soortgelyk slenter het verlede jaar ook die ronde gedoen het wat beweer het Justin Bieber is aangeval. Dieselfde foto is daarvoor gebruik.
