Pierre Korkie
Die internasionale nuusagentskap, Agence France-Presse (AFP) het Sondag volgehou ʼn bemiddelaar, wat glo kontak het met die Al-Kaïda-militante wat Pierre Korkie ontvoer het, is geloofwaardig.
Die humanitêre organisasie, Gift of the Givers, het Sondag die geloofwaardigheid van dié bemiddelaar in twyfel getrek.
“AFP volstaan by die artikel,” het Andrew Beatty, nuusredakteur van AFP vir Suidelike Afrika, aan Sapa gesê. “Die bron is ongetwyfeld geloofwaardig. Weens die sensitiwiteit van die situasie het die persoon slegs die inligting op voorwaarde van sy of haar anonimiteit oorgedra. Ons respekteer dié versoek.”
Die agentskap het Saterdag berig dat die ontvoerders nie Korkie sal teregstel nie, ondanks die feit dat hul sperdatum vir ʼn losprys van R32.5 miljoen Saterdag verstryk het. AFP het die bemiddelaar as hul bron aangehaal.
Dr. Imtiaz Sooliman, stigter van Gift of the Givers, het Sondag gesê hy weet nie wie die bemiddelaar is nie en hy het die persoon se geloofwaardigheid in twyfel getrek. “In Jemen is almal ʼn ‘onderhandelaar’ en ʼn ‘bemiddelaar’,” het Sooliman gesê.
Korkie, ʼn voormalige onderwyser van Bloemfontein, en sy vrou, Yolande, is in Mei 2013 in Taiz, Jemen, ontvoer. Yolande is in Januarie vrygelaat sonder dat ʼn losprys vir haar betaal is. -SAPA
