Willem van der Westhuizen, ʼn 22-jarige inwoner van Potchefstroom, se liggaam is Sondagoggend op ʼn sypaadjie in die dorp gevind.
Kol. Sabata Mokgwabone, ʼn polisiewoordvoerder van Noordwes, het Dinsdag aan Maroela Media gesê Van der Westhuizen se liggaam is op ʼn sypaadjie op die hoek van Marestraat en Walter Sisulurylaan gevind.
“Ons het op hom afgekom waar hy gelê het. Ons het die polisie gebel en hom aan die lewe probeer hou. Met die polisie se aankoms was hy reeds oorlede. Dit is so teleurstellend,” het Anrie Cloete, ʼn inwoner, op ʼn Facebook-blad geskryf.
“Die ondersoek is nog in ʼn vroeë stadium en die motief vir die moord is nog nie bekend nie. Die slagoffer het ʼn steekwond aan sy rug en aan sy bors gehad,” het Mokgwabone gesê.
Mokgwabone sê daar is slegs ʼn huissleutel met ʼn afstandbeheer in Van der Westhuizen se besit gevind. Die polisie ondersoek ʼn saak van moord. Niemand is nog in verband met die voorval in hegtenis geneem nie.
Mokgwabone versoek enigiemand met meer inligting oor die voorval om Crime Stop by 08600 10111 te skakel.
Ai shame!