‘Jou dae is getel’: Lesufi vra verskoning ná opmerking

Panyaza Lesufi. (Foto: Verskaf)

Panyaza Lesufi, Gautengse premier, moes inderhaas die hand van vrede uitsteek ná ʼn video, waarin hy oënskynlik dreigende opmerkings teenoor ʼn ongenoemde minister maak, soos ʼn veldbrand op sosiale media versprei is.

Die video is Sondag tydens ʼn Sanco-vergadering in Johannesburg wat Lesufi toegespreek het, geneem. Volgens ʼn inskrywing van Lesufi op X (voorheen Twitter) het hy die byeenkoms in sy hoedanigheid as Gautengse voorsitter van die ANC toegespreek.

Hy het tydens die toespraak teruggekap op kritiek oor die aanstelling van die groep van sowat 6 000 misdaadbestryders in die provinsie.

Panyaza Lesufi has issued a stern warning to Police Minister Bheki Cele, saying his days are numbered. Lesufi accuse Cele of failing to recognise the Gauteng crime wardens, known as AmaPanyaza. pic.twitter.com/4e3sUKFGVV

— MDN NEWS (@MDNnewss) November 13, 2023

In die video kan gehoor word hoe Lesufi sê: “Ons het hierdie jong mense opgelei om misdaadvoorkomingsbeamptes te wees. Jy, as minister, weier om hulle te erken.”

Onder luide toejuiging voeg Lesufi dan by: “Jou dae is getel.

“Ons kan nie wanneer jong mense ons help om misdaad te bekamp, hulle ondermyn nie. Jy kan nie, wanneer jy jong mense opgelei het om in ons townships se strate ander jong mense te beskerm wat saans studeer, aan hulle nie erkenning gee nie. Ons sê aan die minister, gee ons die magtiging vir dié jong mense om vuurwapens te dra sodat hulle ons townships kan beskerm en misdadigers in ons gebiede kan verdryf.”

We collectively move forward to fight crime. A safer Gauteng needs our collective resolve to work together pic.twitter.com/W5xUDCcqcB

— Panyaza Lesufi (@Lesufi) November 13, 2023

Terwyl Lesufi nie melding maak na presies watter minister hy verwys het nie, het hy onvoorwaardelik om verskoning gevra “aan die betrokke ministers”.

Volgens hom is die video geredigeer en toe versprei nadat hy deelgeneem het aan ʼn interne politieke voorlegging.

“Ongelukkig het hierdie uitgelekte, verkorte uittreksel uit my uitgebreide voorlegging nie ons waardering vir die werk van die polisie en ander wetstoepassingsinstellings in konteks geplaas nie. Dit het eerder ons bekommernisse en frustrasies laat toeneem,” sê Lesufi.

Hy sê ook dat interne politieke debat tussen kamerade en bondgenote soms negatief kan lyk, hoewel daar nie werklik enige kwade bedoelings is nie.

“Aangesien ons frustrasie met misdaadbestryding spruit uit ons daadwerklike gevoel om ʼn verskil te maak, is ons aktief besig om met die betrokke ministers te vergader om die lug te suiwer en bande te herstel,” sê Lesufi.

Lesufi het in Mei vanjaar aangekondig dat 6 000 jong mense as misdaadbestryders opgelei en toegerus is in die hoop om misdaad in die provinsie se brandpunte hok te slaan. Dié projek vorm deel van verskeie planne wat Lesufi het om misdaad in Gauteng te bekamp. Hy het onder meer e-paniekknoppies vir inwoners, die installering van kringtelevisiekameras en ʼn nuwe beheersentrum voorgestel.

Die misdaadbestrydersprojek is egter gou in omstredenheid gedompel ná dit aan die lig gekom het dat die nuwe beamptes se opleiding, toerusting en uniforms die provinsie sowat R450 miljoen gekos het. Action Society het Lesufi se planne as ʼn bemarkingsfoefie bestempel, terwyl ander kenners meen die beamptes se kans om misdaadvlakke te laat daal, is skraal.