Julius Malema glo in padwoedevoorval

Julius Malema by die bekendstelling van die EFF Foto: Werner Beukes/SAPA

Julius Malema by die bekendstelling van die EFF Foto: Werner Beukes/SAPA

Julius Malema, die leier van die Ekonomiese Vryheidsvegters (EFF), en drie ander mans word ondersoek in verband met ʼn beweerde padwoede-aanval wat Dinsdagaand in Polokwane, Limpopo, plaasgevind het.

“Bernard Redelinghuys (22), ʼn inwoner van Polokwane (Pietersburg) het ʼn saak van aanranding en saakbeskadiging by die polisie aanhangig gemaak,” het brig. Hangwani Mulaudzi, ʼn polisiewoordvoerder, bevestig. “Redelinghuys beweer Malema en drie ander mans het hom in ʼn straat in die dorp aangerand,” het Mulaudzi gesê.

“Hy beweer ʼn Mercedes Benz het voor hom ingeswaai toe hy by die straat ingedraai het en dat die Mercedes te naby aan hom gery het. Volgens die motoris het hy sy toeter gedruk om die bestuurder van die Mercedes te waarsku dat hy te naby aan hom is, maar dit was tevergeefs. Die Mercedes het voor die motoris se voertuig tot stilstand gekom,” verduidelik Mulaudzi.

Redelinghuys het aan die polisie gesê drie mans het uit die Mercedes geklim, hom gegryp en rondgestamp en op hom geskree. Malema het toe na bewering uit die motor geklim en by die drie mans aangesluit.

Volgens die motoris het Malema hom geklap en sy voertuig met ʼn voorwerp geslaan. “Dit is in die stadium nog nie bekend waarmee Malema na bewering die voertuig geslaan het nie,” het Mulaudzi gesê. “Die vier het toe glo in die Mercedes geklim en weggery.”

Volgens Mulaudzi kon Redelinghuys net vir Malema herken. Die polisie ondersoek die voorval.

Eyewitness News berig Malema is nie bewus van die aanklag teen hom nie.

Malema is verlede jaar in hegtenis geneem op aanklag dat hy die spoedgrens verbreek het. Hy het glo teen 215km/h in ʼn 120km/h-sone op die N1 in Gauteng gery.

– SAPA

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

3 Kommentare

Jasper ·

Volgende Idi, Dada, soen myself, Amin. Die weermaguniform en donkerbrille sal hy nog kry.

Dan ·

Sterk manne hierdie Malema en trawante – vier teen een. Wonder of hul nog so braaf sou wees indien daar drie ouens saam met Redelinghuys uit sy motor geklim het. Ons ken die antwoord daarop. Groot menere as hul slagoffers in groepe kan pak maar andersins totale lafaards.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.