ʼn Skrootmetaalhandelaar van Pretoria-Tuine is Maandag in hegtenis geneem nadat aluminium oorhoofse geleiers van die Tshwane-munisipaliteit glo op sy perseel aangetref is.
“Die 45-jarige eienaar van A to Z Scrap Metals is ná ʼn inspeksie van sy perseel, geleë in Van der Hoffweg, in hegtenis geneem,” het kaptein Amos Msimango, woordvoerder van die polisie, gesê. “Die polisie het beslag gelê op drie tipes geleiers nadat die eienaar nie kon rekenskap gee waarom hy die munisipaliteit se eiendom in sy besit het nie.”
Sowat 1 600 kg geleiers, ter waarde van ongeveer R9 000, is opgespoor.
Die man sal na verwagting binnekort in die Pretoriase landdroshof verskyn op aanklag van die besit van vermoedelik gesteelde goedere.