ʼn Man is gisteraand doodgeskiet en ʼn ander in hegtenis geneem na ʼn kaping in Midrand.
Volgens Hoofsuperintendent Wayne Minnaar van die Johannesburgse metropolisie het beamptes Dinsdagaand omstreeks 19:00 ʼn verdagte swart Fiat opgemerk. Dié voertuig is vroeër as gekaap aangemeld. “Die bestuurder wou nie stop nie. Na ʼn jaagtog in Republiekweg het die insittendes op die beamptes geskiet. Die polisie het teruggeskiet en een man noodlottig gewond. Een man is in hegtenis geneem en twee mans het te voet ontsnap.”
Die polisie is steeds opsoek na die twee voortvlugtendes. Die gekaapte voertuig en ʼn ongelisensieerde vuurwapen is verhaal.
– Sapa