ʼn Man is met ʼn baksteen doodgeslaan in Rosetenville, suid van Johannesburg, nadat hy en sy vrou Saterdagoggend gekaap is.
Die Star berig die voorval het ten aanskoue van die man se vrou plaasgevind. Die paartjie was glo onderweg van Springs toe hulle omstreeks 02:00 die oggend deur kapers by ʼn verkeerslig ingewag is. Die vrou het glo daarin geslaag om weg te hardloop en in ʼn bos weg te kruip terwyl die kapers haar man met ʼn baksteen in die gesig geslaan het. Die kapers het met die motor gevlug maar het omgedraai toe hulle gesien het die man leef nog en kruip na die kant van die pad. ʼn Veiligheidswag wat die voorval gesien het sê die kapers het teruggekom en die man weer met die baksteen geslaan tot hy op die toneel dood is.
