ʼn 9-jarige seun is ernstig beseer na die staalhek van sy ouerhuis in Falcon Ridge, Gauteng, op hom geval het. Die hek het nagenoeg 100kg geweeg.
Volgens André Visser, ʼn woordvoerder van ER24, het die seun vermoedelik die hek oopgemaak toe dié ontspoor, gekantel en op hom geval het. “Dit het op die linkerkant van sy liggaam geval en hom teen die grond vasgepen. Toe paramedici op die toneel kom, het die seun se ouers hom reeds onder die hek uitgehaal.”
Hy is op die toneel vir kop-, rug- en nekbeserings behandel. Hy is na die Mediclinic in Vereeniging gehaas waar hy tans in ʼn stabiele toestand is.
