Die minister van energie, Dipuo Peters. Foto: GCIS
Peters sê haar departement het ʼn brief geskryf aan die minister van justisie, Jeff Radebe, en gevra dat wetgewing sodoende gewysig word om koperdiefstal as ʼn ernstige misdaad te klassifiseer. Peters sê iemand wat koper steel is ʼn “moordenaar, ʼn dief en ʼn saboteur”. Peters sê koperdiefstal is ekonomiese sabotasie aangesien dit ʼn invloed het op energie, vervoer en telekommunikasie. Peters se uitlatings kom nadat koperdiefstal veroorsaak het dat die Gautrein vir die tweede keer in twee weke nie tussen Hatfield en Centurion in Pretoria geloop het nie. Die departement van energie se direkteur-generaal, Ompi Aphane, sê koperdiefstal het die land verlede jaar nagenoeg R100 miljoen uit die sak gejaag maar dat die indirekte koste op die ekonomie veel hoër was.
