Dubai, die stad met die hoogste wolkekrabbers, gaan nou sy polisiebeamptes met $400 000 Lamborghini-sportmotors toerus.
Volgens Lamborghini se webwerf, ‘n filiaal van die Volkswagen-groep, bereik dié Italiaanse motors 100km/h binne ses sekondes. “’n Vloot van Lamborginis, ter waarde van ongeveer $400 000 (R3,6 miljoen) elk, is deur die polisie in Dubai aangeskaf om by die hoof toeristeaantreklikhede gebruik te word,” het maj.gen. Khamis Mattar Al Mazeina, adjunkhoof van die polisie in Dubai, gesê. “Die doel is om die beeld van die emirate en die statuur wat hy bereik het, te weerspieël. Dit sal ook toerisme bevorder en die sekuriteitsrol, wat die polisie speel om die stad veilig te hou, uitbeeld.”
Die voertuie sal ontplooi word in die gebied naby die wêreld se hoogste gebou, die Burj Khalifa-toring, by Rashid Boulevard, en naby Jumeirah Beach Residence, een van die gewildste waterfrontontwikkelings in Dubai.
