Lolly Jackson, voormalige baas van Teazers, se vermeende moordenaar, George Luca, gaan aan Suid-Afrika uitgelewer word nadat hy sy finale appèlaansoek in ʼn Cipriese hooggeregshof verloor het, het The Star Vrydag berig.
Luca word sedert sy inhegtenisneming by die Nicosia-gevangenis aangehou.
Jackson, die eienaar van die Teazers-ontkleedansklubs, is op 3 Mei 2010 by ʼn huis in Edenglen, naby die OR Tambo Internasionale Lughawe, doodgeskiet.
Luca het net ná Jackson se moord uit die land gevlug en na sy tuisdorp, Limassol in Ciprus teruggekeer. Sy prokureur, Sofronios Sofroniou het aangevoer dat van die klagtes teen Luca reeds ses jaar oud is en dat dit sy kans op ʼn regverdige verhoor kan beïnvloed. Daar is ook kommer dat persone in Suid-Afrika wat hulle aan ondergrondse aktiwiteite skuldig maak, Luca se lewe in gevaar kan stel.