ʼn Vrou is in hegtenis geneem nadat sy haar jong dogter glo vir R50 vir mans aangebied het.
Volgens die Daily Voice is die vrou Vrydag in hegtenis geneem en sal sy Maandag in die landdroshof in Atlantis in die Wes-Kaap verskyn. ʼn Saak van seksuele uitbuiting is aanhangig gemaak nadat die 13-jarige dogter haar vriendin oor die beweerde mishandeling ingelig het. Die vriendin het toe ʼn onderwyser in kennis gestel wat toe die polisie ontbied het.
Die tiener sê sy is as ʼn seksslaaf buite shebeens voor mans geparadeer. Die ma het die geld glo gebruik om alkohol mee te koop.
