Ma wat glo kind vermoor se saak uitgestel

Die saak van ʼn vrou wat daarvan beskuldig word dat sy haar tweejarige seun vermoor het, is Donderdag in die Mitchells Plain landdroshof uitgestel.

Zulpha Jacobs is nie gevra om te pleit nie en die saak is tot 26 April uitgestel terwyl daar gewag word op die uitslae van die nadoodse ondersoek. Jacobs word aangekla van moord nadat haar seun, Tariq, se liggaam op 31 Desember in ʼn vlak graf agter die Imperial skool in Beacon Valley in Kaapstad gevind is. Jacobs het Tariq as vermis aangemeld maar is in hegtenis geneem nadat sy later glo erken het dat sy hom vermoor het. Tariq is Jacobs se derde kind wat in minder as ʼn dekade dood is. Al drie was twee jaar of jonger ten tyde van hulle dood. Die polisie ondersoek ook die ander twee kinders se dood.