ANc-jeugligaleier, Julius Malema. Foto: Werner Beukes/SAPA
Die voorsitter van die ANC se nasionale dissiplinêre komitee, Derek Hanekom, sê Malema is onder meer van wangedrag aangekla na sy uitlatings dat die jeugliga ʼn span na Botswana sal stuur om regime verandering in die land te weeg te bring. Hanekom sê sy komitee sal nou op ʼn tyd, datum en plek vir Malema se verhoor besluit. Malema sal geleentheid kry om homself te verdedig tydens die verhoor. Hy is ook geregtig op verteenwoordiging deur ʼn senior ANC-lid. Die regerende party het woedend reageer op sy jeugliga se verklaring rakende Botswana. Die liga het verlede naweek die verklaring teruggetrek en die ANC om verskoning gevra vir sy leier se uitlatings. Malema is verlede jaar skuldig bevind op ʼn aanklagte wat verband gehou met ʼn aanval wat hy in die media op president Jacob Zuma geloods het. Die ANC het destyds gesê indien Malema weer aan ʼn oortreding skuldig bevind word binne die volgende twee jaar sal hy sy ANC-lidmaatskap verloor.
