Malema glo in hospitaal opgeneem

Die leier van die ANC-jeugliga, Julius Malema, is glo in ʼn private hospitaal in Polokwane in Limpopo opgeneem, berig RSG.

Malema is veronderstel om Donderdag voor die ANC se dissiplinêre komitee te verskyn. Hy en vyf van sy kollegas word daarvan aangekla dat hulle die ANC in oneer gebring het en verdeeldheid in die party saai. Malema het aan die SAUK gesê hy het reeds sy regsverteenwoordigers ingelig dat hy nie more se verrigtinge sal bywoon nie. Daar is vroeër berig dat Malema griepsimptome gehad het toe hy Dinsdag studente by die Universiteit van Limpopo se Turfloop kampus toegespreek het.