ʼn Man het Saterdag dood gebrand nadat hy onder ʼn bakkie vasgevang was wat omgeslaan en aan die brand geslaan het.
Volgens kaptein Pelonomi Makau, ʼn polisiewoordvoerder, het die voorval tussen Mareetsane en Setlagole naby Mahikeng, in Noordwes, plaasgevind.
“Die Toyota Hilux bakkie met vyf insittendes het grafstene en sement vervoer en was van Rustenburg na Kraaipan onderweg. Die bestuurder het beheer oor die voertuig verloor weens ʼn meganiese probleem,” sê Makau. “Die bakkie het gerol en aan die brand geslaan. Die man, ‘n Mosambieker, was onder die grafstene vasgevang en het dood gebrand.”
Die bestuurder is ongedeerd. Twee ander mans is op die toneel vir geringe beserings behandel. Een van die mans is ernstig beseer en na ʼn hospitaal in Mahikeng geneem.