ʼn Plaaswerker is Maandag ernstig beseer nadat hy op ʼn plaas tussen Dealesville en Hertzogville in die Vrystaat deur ʼn plantmasjien raakgery is.
Volgens Vanessa Jackson, ʼn woordvoerder van ER24, het die man op die masjien gesit toe hy glo gegly en onder die voertuig se wiele beland het.
“Sy kollegas het besef die man moet so gou as moontlik behandel word en het hom op die agterkant van ʼn bakkie na ʼn nasionale pad geneem wat makliker toeganklik is vir paramedici,” het Jackson gesê.
Die man het interne beserings opgedoen en sy heup gebreek. Hy is op die toneel gestabiliseer en met ʼn helikopter na die Pelonomi-hospitaal in Bloemfontein geneem.