ʼn Saak van moord word ondersoek nadat die liggaam van ʼn 22-jarige man op die sportveld van ʼn hoërskool in Bonteheuwel in Kaapstad gekry is.
Kol. Tembinkosi Kinana, woordvoerder van die polisie, sê die liggaam is omstreeks 7:30 Dinsdagoggend gevind. Hy sê die man het verskeie steekwonde opgedoen. Kinana kon nie berigte dat die man geld geskuld het aan dwelmhandelaars bevestig nie. “Die omstandighede rondom sy dood word ondersoek.” Kinana sê twee mans is Dinsdag vir ondervraging ingeneem maar later dieselfde dag vrygelaat aangesien hulle nie met die moord verbind kon word nie. Independent Online het die oorledene geïdentifiseer as Anrich Isaacs.