Man dood, twee beseer in vragmotor-ongeluk op N3

Een man is dood en twee ander beseer in ʼn ongeluk op die N3-snelweg naby Durban, het paramedici Dinsdag gesê.

“Die oorsaak van die ongeluk is nog nie duidelik nie, maar ʼn vragmotor wat ʼn ander vragmotor gesleep het, was stilstaande aan die kant van die snelweg. ʼn Derde vragmotor het toe in die twee stilstaande vragmotors vasgery,” het André Visser, woordvoerder vir ER24 gesê. Die ongeluk het net voor middernag in Cato Ridge plaasgevind. Toe die paramedici opdaag was drie beseer, een baie ernstig. “Reddingswerkers het noodbehandeling op hom toegepas, maar hy is op die toneel dood.” Twee ander mans is na ʼn nabygeleë hospitaal geneem.