ʼn 49-jarige man van Noordwes verskyn Donderdag in die Stilfontein-landdroshof nadat hy glo ʼn 39-jarige vrou van die dorp verwurg het.
“Dorah Medupe se liggaam is Maandagaand, 3 Februarie in haar huis aangetref,” het sers. Kelebogile Moiloa, ‘n polisiewoordvoerder, Maandag gesê.
“Die polisie het haar liggaam in die gang van haar huis aangetref, met ʼn serp om haar nek. Haar familie het onraad vermoed nadat sy nie haar kind by die kleuterskool gaan oplaai het nie, en ook nie op oproepe reageer het nie. Hulle is na haar huis en het haar deur oopgebreek.”
Letlatsa Tshabalala is kort na die voorval in hegtenis geneem en het sy eerste hofverskyning op 7 Februarie gemaak. Hy gaan na verwagting Donderdag aansoek doen om borgtog.