ʼn Man is dood en vyf ernstig beseer nadat die bakkie waarin hulle gery het, laat Saterdagaand teen ʼn lamppaal in Germiston gebots het.
Volgens Jeffery Wicks, ʼn woordvoerder van Netcare911, het die ongeluk in Olivierweg naby die Webberweg-kruising in Lambton Gardens gebeur. Na wat verneem word, het die bakkie die pad verlaat waarna dit teen die lamppaal gebots het.
“Volgens ooggetuies het die bakkie skielik vir iets uitgeswaai, oor die randsteen gery en teen die paal gebots,” het Wicks gesê.
Een man is op die toneel dood verklaar. Vyf ander mans is op die toneel stabiliseer en na nabygeleë hospitale geneem vir verdere behandeling.