Die polisie se duikeenheid sal vandag die soektog voortsit na die liggaam van ʼn 30-jarige man wat Maandag naby Gordonsbaai in die Wes-Kaap verdrink het.
Edward Rossouw, woordvoerder van die Nasionale Seereddingsinstituut (NSRI), sê reddingspanne is omstreeks 13:40 gister na die toneel tussen Bikini Beach en die Steenbrasrivier ontbied. Rossouw sê die man se kollega het aan die reddingswerkers gesê dat hy deur branders van die rotse afgeslaan is en vinnig onder die water verdwyn het. Sy kollegas het hom probeer red deur toue in sy rigting te gooi maar sonder sukses. “Ondanks ʼn uitgebreide see- en kuslynsoektog, insluitend ʼn soektog deur die polisie se duikeenheid, is daar geen teken van die vermiste man nie. Die polisie se duikeenheid sal vandag die soektog voortsit.” Die man se naam is nog nie bekend gemaak nie.