‘n 49-jarige man is Dinsdag in hegtenis geneem nadat hy sy tweelingsussie oor alkohol vermoor het.
Die tweeling was glo Saterdag tuis besig om ‘n paar drankies te geniet en ‘n buurvrou het later by hulle aangesluit. Die man was glo ontevrede dat die buurvrou by hulle aangesluit het en verniet wou saam drink.
Volgens sersant Philani Nkwalase, woordvoerder van die polisie in Noordwes, het die broer uit die huis gestap, ‘n baksteen opgetel en dié deur die venster terug in die huis gegooi. Die baksteen het egter sy tweelingsussie teen haar kop getref. Sy is na die plaaslike kliniek geneem vir behandeling en daar gestabiliseer voordat sy ontslaan is. Sy het egter Sondagmiddag tuis aan haar beserings beswyk. Die broer het toe na bewering sy tweelingsussie na ‘n privaatlykshuis geneem sonder om die polisie in kennis te stel.
Die polisie het ‘n wenk hieroor ontvang en gevolglik die broer in hegtenis geneem. ‘n Nadoodse ondersoek sal nou uitgevoer word.
Die broer word van moord aangekla.
