Joernaliste het by ʼn ander Pretoriase hospitaal begin saamdrom nadat dit aan die lig gekom het dat oud-president Nelson Mandela nié by die 1 Militêre Hospitaal behandel word nie.
EWN het Donderdag berig dat Mandela in ʼn ander hospitaal in Pretoria behandel word maar wou nie die hospitaal se naam bekendmaak nie om Madiba se privaatheid te respekteer. Die presidensie wou egter nie kommentaar lewer op die berig nie. “Die presidensie het gesê dat Mandela in ʼn Pretoriase hospitaal behandel word, maar het nooit die hospitaal se naam bekendgemaak nie om Madiba en sy gesin se privaatheid te beskerm,” het Mac Maharaj, president Jacob Zuma se woordvoerder, gesê. Lees meer hier.
ʼn Groot groep joernaliste van internasionale en plaaslike media het sedert Saterdag by 1 Militêre Hospitaal uitgekamp nadat daar berig is dat Mandela in die hospitaal glo vir longinfeksie opgeneem is. Die joernaliste het egter van Vrydag af buite die Medikliniek-harthospitaal in Arcadia bymekaargekom in ʼn poging om uit te vind waar Mandela behandel word.
Onder dié joernaliste is ʼn span van EWN.