‘Mandela se toestand was ernstig’

President Jacob Zuma het Donderdag tydens die einde van die ANC se verkiesingskonferensie in Mangaung gesê oudpresident Nelson Mandela se toestand was ernstig toe hy amper twee weke gelede in die hospitaal opgeneem is.

Die presidensie het aanvanklik gesê Mandela ondergaan roetine-ondersoeke. Daar is later gesê dat hy vir ʼn longinfeksie behandel word en ʼn prosedure ondergaan het om galstene te verwyder. “Sy toestand was ernstig maar hy toon goeie vordering op die behandeling en sy toestand het geleidelik verbeter die afgelope paar dae,” het Zuma gesê. Daar was vroeër omstredenheid nadat dit aan die lig gekom het dat Mandela nie by 1 Militêre Hospitaal behandel word nie hoewel die minister van verdediging aan die media bevestig het dat hy daar behandel word.