Die beskuldigdes in die Bloemfonteinse laserlig-saak is Maandaggend in die stad se landdroshof vrygespreek.
OFM berig die 40-jarige Theunis le Grange, 21-jarige Albertus Niewoudt en ‘n tienerseun was daarvan beskuldig dat hulle tydens die ANC se Eeufeesvieringe vroeër vanjaar ‘n laserlig in die oë van vlieëniers geskyn het.
Herman van Vuuren, die twee mans se regsverteenwoordiger, het gesê vertoë is aan die Direktoraat vir Openbare Vervolging gerig, waarna die saak uitgegooi is. Van Vuuren het gesê beeldmateriaal van sowat 15 minute is in die hof gespeel, waar dit duidelik is dat die 15-jarige seun drie keer vir ‘n sekonde lank ‘n laserlig in die hemelruim ingeskyn het.
Hy het gesê die saak is laat vaar omdat daar nie beduidende getuienis teen La Grange en Niewoudt was nie.
Die seun is vroeër vanjaar deur ‘n hof gelas om spesiale jeugprogramme te volg. Van Vuuren meen die erns van dié tipe oortredings is deur hierdie saak benadruk.
Vishnu Naidoo, nasionale polisiewoordvoerder, het vroeër gesê die skyn van laserligte kan ‘n vlieënier verblind en gedisoriënteerd laat, wat die vliegtuig kan laat neerstort.