Meer as 99% van diamante waarmee wêreldwyd handel gedryf word, is konflikvry, het Susan Shabangu, minister van minerale hulpbronne, Dinsdag gesê.
Sy sê dit het verbruikervertroue in die kommoditeit herstel. Shabangu het aan ʼn vergadering van afgevaardigdes van die regering, diamantbedryf en burgerlike samelewing gesê Suid-Afrika hoop die Kimberley Prosessertifikaatstelsel (KPCS) sal sy wenformule konsolideer en versnel.
Sy sê almal wil seker maak dat hierdie “seldsame en waardevolle kommoditeit” nie as ʼn instrument gebruik word om onskuldige mense te vermink nie.
Die Kimberley-proses, wat tans deur Suid-Afrika gelei word, beoog om seker te maak dat diamante nie gebruik word om geweld deur “rebellegroepe en hul vriende” te finansier nie. Handel in ongeslypte diamante word deur deelnemers aan die KPCS gereguleer en kan slegs met ʼn sertifikaat voortgesit word.
Shabangu het China gelukgewens dat hy as die voorsitter van die Kimberley-proses vir 2014 aangewys is en dat hy die ondervoorsitter in 2013 is.
Sy sê waaksaamheid word vereis om te verhoed dat onwettige diamante die wettige diamantbedryf besoedel.