Metrobeampte verfilm glo seks met prostitute

Die metropolisie in Durban het ʼn interne ondersoek van stapel gestuur na bewerings dat een van sy lede seks van prostitute geëis het en dit dan glo opgeneem het.

Snr. Sup. Eugene Msomi, woordvoerder van die metropolisie, sê hulle ondersoek die saak en dat hulle na afloop hiervan op ʼn weg vorentoe sal besluit. The New Age het Donderdag berig dat die beampte volgens die Women’s Legal Centre (WLC) moontlik van verkragting aangekla kan word. Sithuthukile Mkhize, woordvoerder van WLC, het aan die koerant gesê dat die prostitute geweier het om met die beampte seks te hê en dat hy hulle gedwing het. Volgens die berig het die beampte se vriendin beeldmateriaal op sy selfoon gekry. Die beampte het glo video’s gemaak van hoe hy met minstens vyf prostitute seks het. Msomi sê die ondersoek sal bepaal hoeveel beamptes betrokke was en of strafregtelike klagte aanhangig gemaak sal word. Hy sê die betrokke beampte is intussen steeds by die werk aangesien die polisie se dissiplinêre- en skorsingsbeleid bepaal dat ʼn beampte nie geskors kan word voor hy sy weergawe van die gebeure tydens ʼn dissiplinêre verhoor gegee het nie.