Twee Tshwane-metropolisiebeamptes is in hegtenis geneem vir gewapende roof, het die polisie Saterdag gesê.
“Hulle is Vrydag in Gezina, Pretoria, in hegtenis geneem,” het kapt. Augustinah Selepe, woordvoerder van die polisie, gesê. “Hulle het glo Dinsdagaand ʼn motoris met ʼn vuurwapen gedreig en R550 000 kontant van die motoris gesteel.”
Volgens Selepe het die motoris aangevoer hy is naby Hammanskraal op die N1, noord van Pretoria, vir ʼn spoedoortreding deur die beamptes afgetrek. “Hulle het sy voertuig deursoek en op die kontant afgekom. Hulle het gedreig om hom in hegtenis te neem vir geldwassery.”
Selepe sê die twee beamptes sal Maandag in die landdroshof in Pretoria-Noord verskyn.