rugby
Die Pretoriase hooggeregshof het beslis dat die minister van verdediging skadevergoeding moet betaal ná ʼn operasie op ʼn jong rugbyster by 1 Militêre Hospitaal skeefgeloop het, het die Saturday Citizen berig.
Die bedrag is nog nie vasgestel nie.
Michiel de Goede, wat in 2007 by die Hoërskool Eldoraigne in Centurion in matriek was, het sy knieligament tydens ʼn skolerugbywedstryd geskeur. Hy het reeds ʼn aanbod van die Haaie ontvang en sou die volgende jaar met ʼn professionele rugbyloopbaan begin het.
De Goede is na die hospitaal geneem vir behandeling, maar hy is misdiagnoseer met ʼn verstuite knie en is daar weg met ʼn verband.
ʼn Ortopediese sjirurg van die militêre hospitaal het agt dae later ʼn operasie uitgevoer nadat hy De Goede vir die eerste keer gesien het toe hy met ʼn rolstoel by die teater aangekom het.
Ná ʼn tweede operasie in 2008, by dieselfde hospitaal maar ʼn ander dokter, sou hy met sy kontrak by die Haaie begin het. Die span se biokinetikus het egter besef dat De Goede se knieskyf in die verkeerde posisie is. Hy is na ʼn kniespesialis verwys wat weer ʼn operasie gedoen het. Dié dokter het bevind dat De Goede intussen posttraumatiese osteoartritis opgedoen het. Die skade aan sy knie is onherstelbaar en hy sal nooit weer kan rugby speel nie.
-SAPA
koreksie, ons taxpayers mut weereens opdok